شُفتها بعيني داخلة المكتبة وهيَّ بتتلفت شمال ويمين، ولمَّا اتأكدت إن مفيش غيرها، في ثانية كانت خاطفه الكتاب ومخبياه ورا ضهرها.

أنا بصراحة في الأول – ورغم مظهرها الأنيق – توقعت أنها هتسرق الكتاب وتمشي، لكن فجأة لقيتها بتتحرك تاني وبمنتهى التوتر ناحية الكاشير.. دفعتْ وجِريتْ على بره.

أنا طبعًا الفضول كلني ودخلت أسأله هي ليه كانت متوترة بالشكل ده؟

- يا باشا منا خدت على كده.. اي واحده بتشتري الكتاب ده بتبقى مكسوفه وخايفة حد يشوفها.

- ليه إن شاء الله!! كتاب كيف تزرع الهيروين!!

- يا ريت... ده كتاب Why men love bitches بتاع شيري أرجوف.

أنا طبعًا وقعت على روحي من الضحك وأنا بفتكر شكل محمود صاحبى ليلة زفافه وهو داخل الصيدلية يسأل على حبوب منشطة... للذاكرة.