من خلال مكالمة فيديو وعلى مدار أكثر من 5 ساعات متواصلة، وبعد مار راجعت معاه محتوى الكتاب كله، والآراء العلمية اللي جت فيه؛ وعدت صريقي د."أحمد كمال" الطبيب النفسي إن السؤال الجاي هيكون آخر سؤال:

- إحنا بنحب ليه؟

استقبل سؤالي بضحكته المعهودة ورد:

- ده سؤال المليون دولار زي ما بيقولوا هنا في أمريكا! السؤال اللي مالو إجابة.

سألته:

- مالوش إجابة فعلًا؟

رد:

- مالوش إجابة ثابته تصلح لكل الناس، جمال الحب إنه زي البصمة بيختلف من واحد للتاني، بنحب ليه؟ بنحب لملايين الأسباب اللي مش محتاجين نفسر أي سبب فيهم لحد واللي مش بالضرورة يقنعوا غيرنا، بنحب مين؟ كل اللي حسينا جنبه إننا 1+1 = 1. بنحب إزاي؟ لما بنسمع اللي قدامنا أكثر، وبنديله نفس اللي بنطلبه منه، بنحب امتي؟ لما بنقع في غرام الفعل رغم بساطته، ومش بيغرينا الكلام رغم جماله، الأفعال حضورها طاغي وهي اللغة الوحيدة اللي بيتكلمها وبيسمعها اللي بيحبوا بجد، بنحب ليه؟ إجابة سؤالك في كتابك.. "لهذا نحب"، رحلة بحث في حكايات وقراءات نفسية عن الحب وأسبابه وناسه.