"اللي بين ايديكم بعض من أيامي و أفكاري، حكاياتي مع ناس طيبة وحلوة وغالية مرت في عمري، مواقفي مع الأيام اللي تضحك وساعات تحزن و ساعات تخليك تفكر وتسرح في اللي ورا المعاني. ايوه ما هي الكتابة طول عمرها كانت رفيقة رحلتي في الحياة... عبرت بيها عن اللي مر بيا واللي مر عليا...
اللي بين ايديكم... مش تنظير و لا فلسفة ولا أي حاجة من المعاني المجعلصة دي...دي تجربة انسانة في التعبير عن مشاعرها يمكن تنفع حد أو تضحك حد أو تخلي حد يفكر في حاجة احلى ينفع بيها الدنيا و نفسه. ايوه اصل احنا كلنا شبه بعض اوي مهما اختلفت التفاصيل و ملامح الحاجات و نتايجها...كلنا بشر بنخاف ونحب و ننبهر بالقدوة و نتوتر من التغيير و الجديد في حياتنا و ننقهر من الغدر و الندالة.. وعشان كده اسمع مني و خدها حكمة من اسعاد بنت يونس ...مهما حصل في الكون ومهما عدى عليك افتكر كويس إن الحياه لسة ممكنة .. أيوه ممكنة